Nis rehabilitimi i parkut pranë Bibliotekës së Beratit

Një tjetër hapësirë publike në qytetin e Beratit do t’i nënshtrohet rikualifikimit, në kuadër të investimeve që synojnë përmirësimin e infrastrukturës urbane dhe krijimin e ambienteve më cilësore për qytetarët.

Punimet kanë nisur në parkun pranë Bibliotekës së qytetit, një nga zonat më të frekuentuara në Berat.

Kryetari i bashkisë së Beratit, Ervin Ceca tha se “projekti parashikon rehabilitimin e plotë të parkut përmes vendosjes së ndriçimit publik, instalimit të stolave dhe koshave urbanë, si edhe shtrimit me pllaka guri të zonave të amortizuara, duke e bërë hapësirën më funksionale, të sigurt dhe të aksesueshme për banorët e të gjitha moshave”.

“Projekti financohet nga Programi ”Granti i bazuar në performancë” në kuadër të bashkëpunimit ndërmjet Qeverisë Shqiptare, Agjencisë Zvicerane për Zhvillim dhe Bashkëpunim (SDC) dhe Agjencisë Suedeze për Bashkëpunim Ndërkombëtar për Zhvillim (Sida), të cilat mbështesin forcimin e qeverisjes vendore dhe përmirësimin e cilësisë së jetës në komunitetet tona”, tha Ceca.

Rehabilitimi i parkut pranë Bibliotekës së Qytetit pritet të krijojë një mjedis më tërheqës duke kontribuar njëkohësisht në përmirësimin e imazhit urban të Beratit.