Një vit pas ikjes së azerëve, kompania shqiptare TPD Drilling vë në punë ARMO-n

Sindikata e punonjësve të rafinerisë së përpunimit të thellë të naftës në Ballsh dhe kompania shqiptare TPD Drilling pritet të firmosin në fillim të javës marrëveshjen për rivënien në punë të ARMO-s.

Rafineria e cila prodhon naftë D2, nuk është në punë që prej një viti, pas ikjes së administratorëve nga Azerbajxhani. Kryetari i Sindikatës së Punonjësve Kamber Iliazi, tha për Monitor se sindikata dhe punëdhënësi janë duke arritur një marrëveshje me garancinë e qeverisë.

Vënia në punë e ARMO-s, tha Iliazi, do të rrisë vlerën e industrisë vendase të naftës. Ai garantoi se nafta që prodhohet ne Ballsh është me 5-7 ppm dhe aludimet për cilësinë jo të mirë të naftës rrjedhin jashtë ambienteve të ARMO-s tha ai. Vënia në punë ARMO-s në një kohë që tregu ndërkombëtar ka zbehur kërkesën për naftën shqiptare është një lajm pozitiv për industrinë nxjerrëse.

Por nga ana tjetër administrimi ARMO-s dhe rivënia në punë e saj ka një mal me probleme. Kompania mban në bilancet e saj afërsisht 600 milionë dollarë borxhe.

Rafineria e naftës, 15% të aksioneve të së cilës zotërohen nga shteti dhe 85% nga azerët e Heany Assets Corporation, është kreditori më i madh i keq i vetëm në Shqipëri.

Prej kohësh ARMO është në një situatë tejet të vështirë. Rafineria e Ballshit është mbyllur dhe vlerësohet se ajo nuk është efecientë, ndryshe nga ajo e Fierit që ka ende leverdi. Por kompania TPD Drilling që nëpërmjet një kontrate qiraje prodhon bitum në rafinerinë e Fierit është në tratativa për të rivënë në punë edhe Ballshin.

Shoqëria TPD Drilling sha është një shoqëri tregtare e themeluar sipas ligjeve në fuqi dhe zhvillon aktivitetin e saj qe nga 07.06.2012, sipas faqes së saj zyrtare. Aktiviteti i shoqërisë ka filluar me eksportin e naftës bruto dhe më pas me rafinimim dhe tregtimin e produkteve përfundimtare.

Sipas të dhënave në website e kompanisë, TPD dhe ARMO tashmë kanë një marrëveshje të nënshkruar, sipas së cilës TPD ka marrë rafinerinë e Fierit me anë të një marrëveshje leasing-u dhe furnizon rafinerinë e Ballshit me naftë bruto.

Në planet e saj, TPD ka për qëllim futjen e Diesel-it 10 ppm dhe Gasoil në tregun e Shqipërisë dhe Kosovës. Gjithashtu kompania ka ambicie të zgjerojë aktivitetin edhe në sektorin e kërkimit të naftës.
TPD është pjesë dhe në pronësi tërësisht SPG (Sulaj Progres GROUP SA).

Grupi është i orientuar kryesisht në pronat e pasurive të patundshme dhe të zhvillimit, si dhe shërbim dhe reklamim, zotëron disa nga kompanitë më të njohura tregtare të shërbimit në kryeqytetin e Shqipërisë.