“Njerëzit më quajnë të çmendur”, Britney Spears shpërthen për kujdestarinë ligjore

Britney Spears ka rikthyer vëmendjen te një nga periudhat më të vështira të jetës së saj, duke shprehur sërish zemërimin për vitet që kaloi nën kujdestarinë ligjore, e cila kufizonte lirinë e saj personale dhe kontrollin mbi jetën e saj.

Këngëtarja 44-vjeçare ndau në Instagram një video ku shfaqej e veshur me të brendshme të zeza me dantellë dhe çizme, të shoqëruar me një mesazh të gjatë, të cilin e fshiu më vonë.

Në deklaratën e saj, Britney pranoi se ende ndihet e hidhëruar për atë që ka përjetuar, duke kujtuar vitet kur, sipas saj, nuk mund të merrte lirisht vendime për jetën personale, pavarësisht se punonte pa pushim.

“Po, jam e hidhëruar”, shkroi ajo, duke iu referuar kohës së humbur dhe ndjesisë se nuk kishte mundësi të shfrytëzonte plotësisht potencialin e saj si grua.

Këngëtarja tregoi gjithashtu se, për rreth 15 vjet, nuk mund të udhëtonte lirisht as për të takuar një mikeshë apo mik, për shkak të angazhimeve të shumta profesionale dhe kufizimeve që pretendon se i ishin vendosur.

Ajo kujtoi edhe një detaj që, sipas saj, tregon sa e kufizuar ishte liria e saj financiare: vetëm pesë vjet më parë arriti të mbante në duar për herë të parë një kartëmonedhë.

“Dhe njerëzit ende thonë se e çmendura jam unë”, u shpreh këngëtarja, duke reaguar ndaj mënyrës se si është gjykuar ndër vite.

Britney Spears u vendos nën kujdestari ligjore në shkurt të vitit 2008, pas një periudhe të vështirë personale që u pasqyrua gjerësisht në media.

Babai i saj, Jamie Spears, pati një rol të rëndësishëm në administrimin e financave dhe çështjeve të saj.

Për vite me radhë, këngëtarja kundërshtoi këtë marrëveshje ligjore, duke pretenduar se i kishte shkaktuar vuajtje dhe i kishte hequr kontrollin mbi vendimet e rëndësishme të jetës së saj.

Në vitin 2021, gjatë një seance gjyqësore, ajo e cilësoi kujdestarinë si abuzive dhe kërkoi t’i jepej fund.

Kujdestaria u ndërpre zyrtarisht në nëntor të vitit 2021, pas një beteje të gjatë ligjore që nxiti edhe lëvizjen ndërkombëtare “Free Britney”.