“Nuk ishte për mua”, McConaughey flet për refuzimin e “The Last of Us”

Matthew McConaughey ka zbuluar se ka pasur mundësinë të interpretonte personazhin e Joel Miller në serialin e suksesshëm të HBO-së, “The Last of Us”, por vendosi të mos e pranonte rolin.

Gjatë një interviste në podcastin “Happy Sad Confused” me Josh Horowitz, aktori 56-vjeçar tha se projekti “nuk ishte për të në atë moment”.

I pyetur nëse e kishte konsideruar seriozisht ofertën, McConaughey konfirmoi se kishte pasur bisedime, por në fund vendosi të tërhiqej.

“Në atë periudhë nuk isha shumë i fokusuar te aktrimi. Po merresha më tepër me shkrim dhe me role udhëheqëse në jetën time,” u shpreh ai.

Roli përfundoi te Pedro Pascal, i cili ka marrë dy nominime për Emmy për interpretimin e Joel Miller.

McConaughey kujtoi gjithashtu suksesin e madh të serialit “True Detective”, ku luajti përkrah Woody Harrelson në vitin 2014, duke theksuar se në atë kohë aktorë të profilit të tyre rrallë kalonin nga filmat në seriale televizive.

Nga ana tjetër, bashkëkrijuesi dhe showrunner-i i “The Last of Us”, Craig Mazin, kishte deklaruar më herët se bisedat me McConaughey nuk kishin qenë “serioze”.

“Ishte më shumë një ide për të diskutuar. Pedro Pascal ka qenë në listën tonë që në fillim, edhe pse fillimisht nuk ishte i disponueshëm,” tha Mazin. Ai shtoi se McConaughey është një aktor i jashtëzakonshëm dhe se seriali do të kishte qenë ndryshe me të, por është i kënaqur me versionin që u realizua.

“The Last of Us” ka grumbulluar 40 nominime për Emmy nga viti 2023 deri në 2025 dhe ka fituar nëntë çmime.

Aktori amerikan po promovon aktualisht filmin e tij të ri thriller “The Rivals of Amziah King”, i cili del në kinema këtë të premte. Sipas McConaughey, një nga arsyet pse hezitoi për “The Last of Us” ishte edhe angazhimi afatgjatë që kërkon një serial i suksesshëm.

“Kur një serial ka sukses, duhet të mendosh se mund të jesh pjesë e tij për vite me radhë. Dhe unë duhej të pyesja veten nëse doja që kjo të ishte rruga ime në atë moment,” përfundoi ai.