Opera “Rozafa”, premierë botërore në Teatrin Kombëtar të Operës e Baletit

Mbrëmjen e djeshme, në skenën e Teatrit Kombëtar të Operës, Baletit dhe Ansamblit Popullor (TKOBAP), u shfaq premiera botërore e operës “Rozafa”, një vepër që sjell në skenë një nga legjendat më të fuqishme të trashëgimisë kulturore shqiptare.

Me muzikë të Ndoc Pistullit, libret të Zef Zorbës dhe orkestracion nga Gridi Kraja, opera ndërthur fuqinë e mitit me emocionin e muzikës, duke krijuar një përjetim artistik ku historia, legjenda dhe skena bashkohen në një tërësi të veçantë.

Shfaqja u drejtua muzikalisht nga Gridi Kraja, ndërsa regjia dhe skenografia mbajnë firmën e Andis Gjonit. Në role interpretuan solistët Nina Muho, Denis Skura, Armando Likaj, Solen Alla dhe Bledar Domi, të shoqëruar nga Orkestra Simfonike dhe Kori i TKOBAP-së.

Opera “Rozafa” ka një histori të veçantë krijimi. Kompozitori shkodran Ndoc Pistulli, një talent i rrallë me vesh absolut, u bë pjesë e operës së parë shqiptare, “Mrika”, që në moshën 16-vjeçare si pianisti i saj i parë. Vetëm në moshën 25-vjeçare ai nisi kompozimin e operës “Rozafa”, një vepër që, pas dekadash, u ngjit për herë të parë në skenë, duke shënuar një moment të rëndësishëm për artin lirik shqiptar.

Premiera botërore e “Rozafës” përfaqëson një rikthim të çmuar të një krijimtarie të mbetur për vite jashtë skenës dhe një homazh për trashëgiminë muzikore e kulturore shqiptare.