Operacion tjetër për ndërtimet pa leje në Sarandë, dhjetëra urdhër-arreste për policë, zyrtarë dhe biznesmenë

Prokuroria e Sarandës ka lëshuar këtë të hënë dhjetëra urdhër-arreste ndaj efektivëve të Komisariatit të Sarandës, zyrtarëve lokalë si dhe biznesmenëve apo ndërtuesve, të cilët dyshohen për vepra të ndryshme penale që lidhen me ndërtimet pa leje në Sarandë dhe Ksamil ndërsa një operacion i gjerë i Drejtorisë së Policisë së Vlorës dhe Komisariatit të Sarandës është duke u zhvilluar në shtrirje të gjerë në zonë.

Deri tani mësohet se janë ekzekutuar vetëm dy urdhër-arreste, konkretisht një efektiv i Komisariatit të Sarandës dhe një biznesmen, ndërsa emrat e tyre fillimisht nuk janë bërë publikë. Ndërkohë, kontrollet në banesa dhe ambiente të tjera vijojnë me qëllim ekzekutimin e urdhër-arresteve të mbetura.

Nga burime bëhet me dije se të arrestuarit janë Kristofor Shkrepa, inspektor i policisë së zonës në Ksamil, si dhe A.P, pronar i një hoteli në Sarandë.

Operacioni vijon dhe priten zhvillime të tjera lidhur me ekzekutimin e urdhër-arresteve të mbetura.