Osmani në Nju Jork në aktivitetin e ‘Women Political Leaders’: Përfaqësimi i grave në vendimmarrje forcon sigurinë dhe demokracinë

Ish-presidentja e Kosovës, Vjosa Osmani, po vazhdon aktivitetet në Shtetet e Bashkuara të Amerikës, ku është ftuar nga organizata ndërkombëtare “Women Political Leaders” për të marrë pjesë në një diskutim të nivelit të lartë.

Gjatë fjalës së saj, Osmani foli për ndikimin që ka përfaqësimi i drejtë i grave në proceset e paqes dhe ato të sigurisë, duke theksuar se kjo nuk është thjesht çështje pjesëmarrjeje, por një komponent thelbësor i ndërtimit të shoqërive më të sigurta, më gjithëpërfshirëse dhe më të qëndrueshme.

Ajo u ndal edhe te ndikimi që zhvillimet teknologjike po kanë në sigurinë globale, duke vënë në dukje se në një kohë kur paqja, siguria dhe demokracia po përballen me sfida të reja — përfshirë edhe ato në hapësirën digjitale — zëri dhe roli i grave në vendimmarrje bëhet edhe më i domosdoshëm.

“Përfaqësimi i grave në proceset vendimmarrëse forcon sigurinë dhe demokracinë”, theksoi Osmani, duke shtuar se investimi në barazi gjinore në tavolinat ku merren vendimet është investim në paqe afatgjatë.

Vizita dhe aktivitetet e Osmanit në Nju Jork vijnë në një moment të ngarkuar diplomatik, ku liderë botërorë diskutojnë për sfidat globale të sigurisë dhe bashkëpunimit ndërkombëtar.

Burimi: Klan Kosova