Pas largimit të Macklemore, Ed Sheeran flet për herë të parë: Kam bërë gabime

Këngëtari britanik Ed Sheeran është përfshirë në një debat të ashpër lidhur me qëndrimin e tij ndaj luftës Izrael-Hamas, ndërsa turneu i tij në SHBA është përballur me një sërë zhvillimesh të papritura.

35-vjeçari kërkoi falje para publikut gjatë koncertit të së shtunës në Filadelfia për mënyrën se si kishte trajtuar polemikën që shpërtheu pas largimit të reperit Macklemore nga koncertet e tij.

Macklemore ishte hequr nga lista e artistëve mbështetës pas deklaratave të tij pro-palestineze gjatë dy koncerteve të Sheeran në New Jersey. Pas këtij vendimi, edhe artistët e tjerë që shoqëronin turneun – Finneas, Lukas Graham dhe Aaron Rowe, si dhe grupi mbështetës Beoga – njoftuan largimin në shenjë solidariteti me reperin dhe palestinezët.

Gjatë koncertit në Filadelfia, Sheeran lexoi një deklaratë nga teleprompteri, duke pranuar se kishte bërë “gabime” në mënyrën se si e kishte menaxhuar situatën.

“Kam provuar gjatë gjithë karrierës sime të mos jem një komentues politik, sepse dua që muzika dhe koncertet e mia të jenë për bashkimin dhe jo ndarjen, për njerëzimin dhe jo politikën”, tha ai.

Megjithatë, këngëtari shtoi se bëhej fjalë për një çështje humanitare dhe se nuk mund të fshihte më qëndrimin e tij.

“Ajo që ndodhi në festivalin Nova në Izrael më 7 tetor ishte e tmerrshme. Ajo që po ndodh në Gaza është katastrofike, e pajustifikueshme dhe disproporcionale”, u shpreh Sheeran.

Ai tha gjithashtu se ishte i tronditur nga përmasat e shkatërrimit dhe humbjes së jetëve civile, veçanërisht të fëmijëve, ndërsa theksoi se padrejtësitë e raportuara në Bregun Perëndimor nuk mund të anashkalohen.

Komentatori britanik Piers Morgan reagoi ndaj deklaratës së Sheeran në rrjetin X. Morgan tha se ishte dakord me përshkrimin që Sheeran i bëri konfliktit, por kritikoi faktin që këngëtari u detyrua, sipas tij, të fliste publikisht për këtë çështje.

“Do të doja të mos ishte përkulur para turmës dhe të mos ishte ndier i detyruar ta thoshte publikisht, veçanërisht duke e lexuar nga teleprompteri”, shkroi Morgan.

Komentet e tij u mbështetën nga disa përdorues të rrjeteve sociale, ndërsa të tjerë argumentuan se përdorimi i teleprompterit nuk do të thotë domosdoshmërisht se Sheeran nuk ishte i sinqertë.

Një komentues shkroi se Sheeran është këngëtar dhe jo politikan, ndërsa një tjetër argumentoi se të flasësh për një konflikt kaq të ndjeshëm para një audience prej dhjetëra mijëra njerëzish kërkon përgatitje dhe kujdes.

Pavarësisht presionit për anulimin e turneut, Sheeran tha se kishte vendosur të vazhdonte performancat. Ai tregoi se, ndërsa njerëzit rreth tij i kërkonin të anulonte, ai pa shifrat e shitjeve të biletave dhe vuri re se nuk kishte një valë anulimesh.

“Gjithkush më thoshte të anuloja. Po ndihesha sikur miqtë, familja dhe njerëzit që njoh po më braktisnin. Dhe në fund të javës shoh 50 mijë njerëz që nuk më kanë braktisur”, tha ai.

Këngëtari u emocionua gjatë koncertit dhe falënderoi fansat për mbështetjen. Në fund të mbrëmjes, Sheeran kërkoi falje që pjesa e parë e koncertit ishte kthyer në një moment politik.

“E kuptoj që ka njerëz që kanë sjellë fëmijët këtu dhe familjet nuk kanë blerë bileta për të dëgjuar këtë në fillim të koncertit. Por kjo ishte diçka që ndjeva se duhej ta thosha”, u shpreh ai.