Pas shkarkimit të Rovena Gashit, shkarkohet edhe i shoqi, Dritan Gina: Urdhri arbitrar, refuzoj ta zbatoj

“Në mënyrë arbitrare janë ndërprerë funksionet e mia si drejtues i Prokurorisë Elbasan. Kjo lëvizje antiligjore e nxitur dhe nga qarqe të caktuara politike. Ndërprerja e komandimit mund të bëhet vetëm nga KLP, i cili nuk është krijuar”, ka thënë në reagim prokurori Dritan Gina. Nuk mund ta braktisë detyrën në bazë të një urdhri të paligjshëm. Refuzoj të zbatoj këtë urdhër dhe do të vijojë të ushtrojë funksionet e mia”, thotë Gina.

Ai është ndalur edhe tek ngjarjet kryesore të Elbasanit gjatë muajve që Gina ishte drejtues i Prokurorisë së Elbasanit.

“Për ngjarjet e Elbasanit nuk ka patur neglizhencë. Por autorët e ngjarjes në Elbasan nuk janë identifikuar, pasi policia nuk ka mbledhur provat. Vendimmarrja nuk bazohet në asnjë analizë. Kryeprokurorja nuk ka bërë asnjë mbledhje dhe nuk ka kërkuar asnjë analizë. Kryeprokurorja pas kontakteve politike ka nxjerrë vendimin për largimin tim nga detyra. Në aspektin personal nuk e kam aspak problem të largohem. Jam i nderuar që jam emëruar në Tiranë. Nuk mund të braktis detyrën, refuzoj ta zbatoj, pasi vendimi është i paligjshëm”, – u shpreh prokurori Dritan Gina.

Dritan Gina është bashkëshorti i Rovena Gashit, ish drejtore e Marrëdhënieve me Jashtë në Prokurorinë e Përgjithshme, njeriu më i afërt i ish Prokurorit të Pergjithshëm Adriatik Llalla.