Pas “shuplakës” së Will Smith, Chris Rock zbulon kushtin për rikthimin në Oscars

Chris Rock ka zbuluar se nuk ka ndërmend të rikthehet në ceremoninë e çmimeve Oscars, përveçse nëse një ditë do të jetë vetë i nominuar për një çmim.

“Unë nuk jam i nominuar. E vetmja mënyrë që do të shkoj përsëri është nëse nominohem, dhe nuk do të nominohem”, tha komediani 61-vjeçar në një intervistë për Variety.

“Dhe kjo është në rregull. Do të merremi me këtë nëse ndodh. Le të kemi pritshmëri realiste”, shtoi Rock.

Rock, i cili ka drejtuar ceremoninë e Oscars në vitet 2005 dhe 2016, nuk është rikthyer në event që prej incidentit famëkeq të vitit 2022, kur aktori Will Smith e goditi në skenë.

Ngjarja ndodhi pasi Rock bëri një batutë për Jada Pinkett Smith, e cila prej vitesh ka folur publikisht për problemet me alopecinë. Pak çaste më vonë, Smith u ngjit në skenë dhe e goditi Rock-un. Pavarësisht incidentit, Smith fitoi më vonë atë mbrëmje çmimin Oscar për aktorin më të mirë për rolin në filmin King Richard.

Pas ngjarjes, Smith u përjashtua nga ceremonitë e Oscars dhe aktivitetet e Akademisë për një periudhë 10-vjeçare. Rock, ndërkohë, nuk është shfaqur më në ceremoninë e ndarjes së çmimeve.

I pyetur për incidentin, katër vite më vonë, Rock tha se do të dëshironte që gjithçka të mos kishte ndodhur. Megjithatë, komediani nuk dëshironte që vëmendja e intervistës të përqendrohej te konflikti me Smith-in. Ai theksoi se nuk donte të largonte vëmendjen nga aktorja Rosalind Eleazar dhe performanca e saj në filmin e tij të ri, Misty Green.

“Është një botë e çmendur. Kalojmë pranë njerëzve të pastrehë. Ka gjithë llojet e gjërave që po ndodhin tani. Unë të kem një ditë të keqe nuk është gjëja më e madhe – nuk është aq e rëndësishme”, tha Rock.