“Për pak sa nuk vdiqa”, James McAvoy tregon betejën e frikshme shëndetësore

Aktori James McAvoy ka zbuluar se për pak sa nuk humbi jetën pas një procedure mjekësore që shkoi keq, duke përfunduar i shtruar në spital për disa javë.

Aktori 47-vjeçar e ndau përvojën e frikshme gjatë një interviste në podcastin “Armchair Expert”, të drejtuar nga Dax Shepard, ku tregoi se gjithçka nisi pasi mjekët zbuluan një njollë në mushkëritë e tij dhe vendosën të kryenin një biopsi për të kontrolluar nëse bëhej fjalë për kancer.

Për fat të mirë, ekzaminimi nuk zbuloi kancer, por procedura pati komplikacione serioze.

“Procedura shkoi keq dhe për pak sa nuk vdiqa”, rrëfeu aktori.

McAvoy tregoi se vetëm dy ditë pas ndërhyrjes, ndërsa ndodhej në shtëpi, mushkëritë iu kolapsuan papritur teksa ishte shtrirë në shtrat. Në atë moment, ai ishte vetëm, çka e bëri situatën edhe më të frikshme.

Aktori u shtrua në spital, ku qëndroi për dy deri në tri javë. Mjekët u përpoqën me metoda të ndryshme të trajtonin komplikacionet, por gjendja nuk po përmirësohej siç shpresohej.

Sipas rrëfimit të tij, mjekët i shpjeguan se mund të nevojitej një ndërhyrje shumë më invazive kirurgjikale për të pastruar mushkëritë.

Problemet shëndetësore ndodhën në vitin 2017, përpara se McAvoy të niste përgatitjet për filmin “Glass”, vazhdimin e thrillerit psikologjik “Split”, ku ai rikthehet në rolin e Kevin Wendell Crumb, personazhit me personalitete të shumëfishta, përfshirë edhe Bishën.

Pas daljes nga spitali, aktori duhej të rifitonte forcën fizike për t’u përgatitur për rolin. Ai tregoi se për katër javët e para, trajneri personal u përqendrua kryesisht te rehabilitimi, pasi McAvoy mund të ecte, por nuk ishte ende në gjendje të vraponte, të bënte vrap të lehtë apo të ngiste biçikletën.

Më pas, programi kaloi gradualisht te ushtrimet funksionale dhe ndërtimi i masës muskulore, në mënyrë që ai të arrinte formën fizike të kërkuar për personazhin.