Pete Davidson në një romancë të re dashurie

Pete Davidson duket se po ecën përpara pas ndarjes nga Elsie Hewitt. Komediani u fotografua në Brooklyn në shoqërinë e yllit të reality show-t “Love Thy Nader”, Sarah Jane Nader, duke nxitur menjëherë spekulime për një romancë të re.

Sipas pamjeve të publikuara nga Deuxmoi, Davidson dhe Nader u panë duke ecur së bashku drejt makinës së aktorit, i cili i hapi derën e pasagjerit para se të largoheshin.

Burime për TMZ thanë se të dy darkuan në restorantin italian Campania në Bay Ridge, ku hynë nga hyrja e kuzhinës për të shmangur vëmendjen. Sipas të njëjtave burime, ata kaluan disa orë në një sallë private dhe shfaqeshin shumë të afërt gjatë gjithë mbrëmjes.

Dalja e tyre vjen tre muaj pas ndarjes së Davidson nga Elsie Hewitt. Ish-çifti i dha fund lidhjes vetëm pak muaj pasi u bënë prindër të vajzës së tyre, Scottie Rose.

Pas ndarjes, Hewitt la të kuptohej në rrjetet sociale se po përballej e vetme me kujdesin për vajzën, ndërsa burime pranë aktorit kundërshtuan këto pretendime, duke deklaruar se Davidson vazhdon të mbulojë të gjitha shpenzimet për ish-partneren dhe vajzën e tyre.

Së fundmi, përfaqësuesit e të dyve konfirmuan se kanë arritur një marrëveshje për bashkëprindërimin dhe se prioriteti i tyre mbetet mirëqenia e vajzës.