Policia britanike nis hetimet për donacionet për Partinë Reformiste të Farage

Policia britanike po heton të paktën 500,000 £ në donacione për partinë populiste Reform UK të Nigel Farage, të bëra nga nëna e një aleati të ngushtë politik i cili u dënua për mashtrim me rrjetet sociale.

Policia tha se po hetonte vepra të mundshme penale sipas ligjeve që rregullojnë donacionet për partitë politike, të cilat mund të përfshijnë fshehjen e burimit të financimit ose dhënien e informacionit të rremë arkëtarit të një partie.

“Një hetim u nis në shkurt të vitit 2025 pasi Komisioni Zgjedhor i bëri një referim Policisë Metropolitane në lidhje me donacionet e bëra për një parti politike përpara Zgjedhjeve të Përgjithshme të Mbretërisë së Bashkuar të vitit 2024”, tha një zëdhënës i Policisë Metropolitane të Londrës.

Dy persona janë marrë në pyetje, por nuk është bërë asnjë arrestim, shtoi policia, pa konfirmuar emrat e atyre që janë përfshirë në donacionet që po hetohen.

Richard Tice, zëvendëskryetari i Reformës tha se hetimi ishte pjesë e një “fushate shpifjesh të motivuar politikisht”.

Farage është përballur me pyetje për javë të tëra në lidhje me fondet e partisë së tij dhe çështjet e tij financiare , duke përfshirë dhuratat e pazbuluara nga një investitor miliarder i kriptomonedhave dhe një aleat politik prej kohësh, George Cottrell.

Cottrell shkoi në burg në SHBA në vitin 2017 pasi u deklarua fajtor për mashtrim me transferta elektronike dhe tani punon me kriptomonedha.

Gazeta “The Times” tha se hetimi i policisë po shqyrtonte pagesat e bëra nga nëna e Cottrell për Reform para zgjedhjeve të vitit 2024.

Farage ka mohuar vazhdimisht çdo shkelje, duke thënë se e mori donacionin nga investitori miliarder i kriptovalutave përpara se të shpallte kandidaturën e tij në zgjedhjet e vitit 2024, dhe për këtë arsye nuk kishte nevojë ta deklaronte atë.

Udhëheqësi i Reformës, i cili ishte një aktivist i zëshëm i Brexit-it, njoftoi papritur më parë këtë javë se do të jepte dorëheqjen nga vendi i tij parlamentar dhe do të kandidonte përsëri atje, duke kërkuar një votë besimi nga votuesit për t’iu përgjigjur kritikave në lidhje me financat e tij.