Presidenti iranian: Programi raketor nuk është pjesë e marrëveshjes me SHBA-në

Presidenti Iranian, Masoud Pezeshkian tha të martën se raketat e Iranit nuk janë pjesë e memorandumit të mirëkuptimit me Shtetet e Bashkuara.

“Diskutimi mbi raketat tona nuk ekziston në Memorandumin e Mirëkuptimit dhe nuk do të ekzistojë kurrë”, tha Pezeshkian gjatë një konference për shtyp në Pakistan.

Ai e mbrojti programin raketor të Iranit si thelbësor për mbrojtjen kombëtare.

“Nëse nuk do të kishim raketat që përdorim për mbrojtjen tonë, Izraeli dhe Shtetet e Bashkuara do ta kishin shkatërruar Iranin”, shtoi ai.

Pezeshkian i bëri komentet gjatë një vizite në Islamabad, ku zhvilloi bisedime me zyrtarë pakistanezë mbi lidhjet dypalëshe dhe zhvillimet rajonale.

Javën e kaluar, Shtetet e Bashkuara publikuan tekstin zyrtar të memorandumit të mirëkuptimit të arritur me Iranin.

Një zyrtar i lartë i administratës amerikane lexoi dokumentin me 14 pika, i cili përfshin dispozita për rihapjen e Ngushticës së Hormuzit, lehtësimin e disa kufizimeve financiare ndaj Iranit dhe përcaktimin e pritjeve për bisedimet e ardhshme teknike mbi programin bërthamor të Iranit.

Teksti i publikuar nuk përmend asnjë kërkesë që Irani të kufizojë programin e tij të raketave ose aftësitë e tij më të gjera mbrojtëse. I vetmi kufizim i qartë në lidhje me armët ka të bëjë me premtimin e Iranit për të mos “prodhuar ose zhvilluar armë bërthamore”.

Presidenti amerikan, Donald Trump më parë e kishte bërë kufizimin e programit raketor të Iranit një arsyetim qendror për operacionet ushtarake amerikane, qëndrimi i tij ndryshoi gjatë negociatave diplomatike. Ai deklaroi në samitin e G7 javën e kaluar se raketat nuk janë problemi.