Prishtinë: Shpërndahen protestuesit, situata drejt normalizimit

Situata në Prishtinë, pas protestave të dhunshme të opozitës, ka nisur të qetësohet, ndërsa protestuesit janë shpërndarë dhe policia është tërhequr.

Më herët, ndërtesa e Qeverisë së Kosovës mori flakë nga shishet e shumta të molotovit, që protestuesit hodhën në drejtim të Qeverisë. Pas kësaj ka ndërhyrë Policia e Kosovës e cila ka hedhur gaz lotsjellës për të shpërndarë protestuesit.

Nga përplasja e ashpër mes Policisë së Kosovës dhe protestuesve, kanë mbetur disa policë të lënduar. Gazetarët e KosovaPress-it në terren raportojnë se disa policë kanë marrë goditje nga gurët dhe mjetet e forta që po hidhen në drejtim të tyre.

Përplasjet u zhvilluan edhe në sheshin “Zahir Pajaziti”,ku Policia u detyrua t’i shpërndajë protestuesit që filluan të hedhin koktej molotovi në drejtim të objektit të Qeverisë në sheshin “Skëndërbeu”.

Ndërkohë, policia arrestoi disa nga protestuesit e dhunshëm që kanë hedhur në drejtim të tyre koktej Molotovi. Raportohet se deri më tani janë arrestuar gjashtë protestues.

Aleanca për Ardhmërinë e Kosovës dhe lideri i saj Ramush Haradinaj kanë apeluar me anë të një komunikate që të tërhiqen të gjithë të përfshirët në incidentet e dhunshme pas protestës së sotme të opozitës në Prishtinë.

“Protesta e sotme e mbajtur në Prishtinë, ishte protesta më e madhe e mbajtur që nga paslufta. Dhjetëra mijëra qytetarë nga të gjitha përcaktimet politike, sot i thanë jo qeverisë Mustafa. Mesazhet e kësaj proteste ishin më të qartat dhe më të vendosurat se kjo qeveri nuk mund ta vazhdojë mandatin e saj. Ne si parti politike u shprehim falënderimet më të thella qytetarëve të Kosovës, për angazhimin e tyre dhe për vendosmërinë që të jenë aktiv në vendimet e rëndësishme për vendin”, thuhet në komunikatë, ndërsa theksohet se aleanca jonë do të vazhdojë të jetë e lidhur ngushtë me qytetarin e vendit edhe në këto momente të ndjeshme.

Në ora 17.00, pritet një konferencë shtypi e Policise së Kosoves.