Prokurori Markoviç: S’u përdor ‘topi akustik’ në protestën e 15 marsit — do ketë dënime për përgjegjësit

Prokuroria e Lartë Publike e Beogradit ka arritur në përfundimin me siguri të plotë se më 15 mars, gjatë tubimit masiv të protestës në kryeqytetin serb, nuk u përdor as “topi akustik” (“zvučni top”), as ndonjë pajisje tjetër akustike e ngjashme. Këtë e deklaroi zëvendëskryeprokurori publik Miodrag Markoviç në emisionin “Zvučni top – šta je otkrila istraga” të Radio-Televizionit të Serbisë (RTS). Sipas tij, prokuroria ka mbledhur prova të shumta që e lejojnë këtë konkludim.

Markoviç tha se prokuroria sheh elemente të veprave penale kundër rendit kushtetues të Serbisë: “thirrje për ndryshim të dhunshëm të rendit kushtetues, të kryer apo në tentativë”, si dhe veprime përgatitore. Ai bëri të ditur se faza e mbledhjes dhe e analizës së provave tashmë ka përfunduar.

Sipas tij, tani vijon faza e hetimit të përgjegjësisë penale individuale. Prokuroria paralajmëroi individualizimin e përgjegjësisë penale dhe fillimin e procedurave ndaj të dyshuarve: “Të gjithë autorët do të ndiqen penalisht, asnjë nuk do t’i shpëtojë”, deklaroi Markoviç.

Ai shtoi se do të vijojnë veprimet provuese, pas të cilave pritet ngritja e aktakuzave dhe zhvillimi i gjyqeve.

Burimi: Danas