Sikorski kërkon armëpushim të shpejtë në Detin e Zi për kalimin e grurit nga Ukraina dhe Rusia

Ministri i Jashtëm i Polonisë, Radoslaw Sikorski, kërkoi të premten një armëpushim të shpejtë në Detin e Zi, që do të lejonte kalimin e sigurt të dërgesave me grurë nga Ukraina dhe Rusia, siç njofton Reuters. Ai tha se Moska duhet t’i japë fund luftës ndaj Ukrainës para se t’i lejohet të rifillojë shitjet e energjisë në Evropë.

“Fola në favor të bërjes së diçkaje shpejt, sepse njerëzit e Jugut Global kanë nevojë për këtë grurë”, u tha Sikorski gazetarëve gjatë takimit dyditor të ministrave të jashtëm të G20-s në Atlanta. I ftuar nga SHBA-ja, vendi pritës i takimit, ai theksoi se Ukraina duhet të përfshihet në çdo përpjekje për t’i dhënë fund pushtimit rus të Ukrainës, tani në vitin e pestë.

Sipas Sikorskit, edhe Evropa ka “karta” në këtë çështje dhe duhet të përfshihet. Ai kërkoi një “përfundim të drejtë” të luftës para se Rusia të mund t’ia shesë sërish Evropës produktet e energjisë, dikur tregu i saj më fitimprurës.

Në Atlanta u diskutua edhe e ardhmja e Polonisë në G20. SHBA-ja, që mban presidencën e radhës të G20-s këtë vit, ka propozuar që Polonia të bëhet anëtare e plotë, ashtu si Gjermania apo Franca, që përfaqësohen edhe përmes BE-së. Sikorski e mirëpriti këtë shtytje dhe e diskutoi me disa vende të G20-s në takime dypalëshe, por zyrtarë perëndimorë thonë se mund të duhen vite që Polonia të pranohet, për shkak të kundërshtimit rus dhe kërkesës së G20-s për vendime konsensuale. Ministri i Jashtëm rus, Sergei Lavrov, u tha gazetarëve se ftesa e Polonisë ishte kundërproduktive dhe shkeli praktikën diplomatike të kërkimit të konsensusit: “Sigurisht, kjo shkel parimet e diplomacisë, e sidomos të diplomacisë shumëpalëshe, kur anëtarët e shoqatave si G20 punojnë mbi bazën e konsensusit”.

Mbështetje për Varshavën erdhi nga sekretari amerikan i Shtetit, Marco Rubio, i cili, në një pritje për ministrat te Georgia Aquarium në Atlanta, tha se Polonia meritonte të bëhej anëtare e plotë dhe se presidenti Donald Trump beson se suksesi ekonomik dhe ndikimi global në rritje i Polonisë janë pikërisht ajo që i duhet G20-s. Sikorski tha gjithashtu se Britania, që do të kryesojë G20-n vitin tjetër, e ka ftuar tashmë kryeministrin Donald Tusk në samitin e liderëve të vitit 2027 në Manchester.