Prokuroria jep detaje për krimin në Livoç: 38-vjeçari dyshohet se vrau gruan dhe vëllain e saj

Prokuroria Themelore në Gjilan ka dhënë detaje lidhur me vrasjen e dyfishtë dhe plagosjen e rëndë që ndodhi të premten në fshatin Livoç i Poshtëm të Gjilanit, siç njofton Klan Kosova.

Sipas komunikatës së Prokurorisë, dyshohet se një 38-vjeçar nga Gjilani, me inicialet V.R., për motive ende të panjohura, me armë zjarri ka privuar nga jeta bashkëshorten e tij, N.B., 27 vjeçe, dhe vëllain e saj, E.B., 31 vjeç.

Po ashtu, i dyshuari dyshohet se ka plagosur rëndë djalin e xhaxhait të bashkëshortes së tij, M.B., 48 vjeç, i cili po trajtohet në Qendrën Klinike Universitare të Kosovës (QKUK) për shkak të plagëve të marra. Rasti është raportuar në Polici më 9 tetor, rreth orës 14:30.

Gjatë ekzaminimit të vendit të ngjarjes, sipas Prokurorisë, është sekuestruar një pistoletë e markës “Beretta”, me leje të skaduar, me të cilën dyshohet se është kryer vepra penale, si dhe prova të tjera materiale; kontrolle u kryen edhe në tri lokacione që lidhen me pronat e të dyshuarit.

Në komunikatë theksohet se i dyshuari nuk ka të kaluar kriminale dhe se ndaj tij nuk ka pasur raste të raportuara për dhunë në familje. Prokuroria Themelore në Gjilan, në koordinim me Policinë e Kosovës, njoftoi se do të vazhdojë me veprimet hetimore për ndriçimin e plotë të rrethanave të këtij rasti të rëndë, raporton Klan Kosova.