Protesta e naftëtarëve, administratori i ARMO premton dhënien e pagave
Protesta e naftëtarëve të rafinerisë së Ballshit para Ministrisë së Energjisë për mosmarrjen e pagave, pati rezultat vetëm një premtim. Administratori angazhohet për të bërë pagesat më 29 dhjetor.
Por duket se ky premtim nuk i kënaqi protestuesit, të cilët qenë nisur në këmbë nga Ballshi, për të mbërritur në Tiranë. Sipas tyre, pa një dokument të firmosur s’mund të ketë marrëveshje.
“Këtu do të qëndrojmë, nuk largohemi. Ata do të shkojnë në restorantet më të mira, ne nuk largohemi nga këtu pa marrë pagat”, thonë protestuesit.
Protesta qe paqësore, por nuk munguan momentet e tensionit.
Ndërkohë, në një deklaratë të përbashkët pas takimit Ministria e Financave dhe ajo e energjisë thonë se rafineria është një ndërmarrje në pronësi e përgjegjësi private, e për pasojë është detyrim ligjor dhe kontraktual i punëdhënësit privat të respektojë të gjitha detyrimet sipas legjislacionit në fuqi.
Rafineria e Ballshit, në pronësi të kompanisë IRTC SHA, gjendet në vështirësi të mëdha financiare. Një ditë më parë, kjo kompani deklaroi se nuk po merr naftë bruto për t’u përpunuar nga “Bankers Petroleum” dhe kjo gjë sipas tyre ka shkaktuar vështirësi. I menjëhershëm ka qenë reagimi i “Bankers”, duke thënë se rafineria e Ballshit nuk ka shlyer detyrimet për naftën e marrë dhe për pasojë ka ndërprerë furnizim.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.