Protesta për hidrocentralin, në hetim 60 persona, prishën flamurin turk në Fan të Mirditës

Ngjarja për të cilën akuzohen ka ndodhur mesditën e datës 31 dhjetor, vetëm pak orë përpara ndërrimit të viteve, në digën e hidrocentralit të Qafë-Mollës, në Fan të Mirditës.

Personat po prishnin flamurin turk të vendosur në basoreliev mbi digën e hidrocentralit të ndërtuar nga kompania turke “AYEN”. Gjatë deklarimeve të dhëna në polici, personat e përfshirë në këtë ngjarje janë shprehur se ata nuk janë pyetur për investimin, i cili sipas tyre ka ndërruar rrjedhjen e lumit dhe se nuk duan investime turke në zonën e tyre.

Protesta kundër vendosjes së flamurit turk mbi digën e hidrocentralit u lajmërua në rrjete sociale.

Por për Erion Perikun, drejtorin e kantierit, protesta ishte e papritur. “Jam munduar të komunikoj me ta, por ishte e pamundur. Turma ka ardhur e acaruar nga Rrësheni dhe s’ja kemi dal për të biseduar me ta. Një pjesë të madhe të tyre unë e njihja, gati gjysma e tyre kanë qenë punonjës të kësaj kompanie”, tha Erion Periku, drejtor i kantierit.

Erion Periku shpjegon se vendosja e flamujve ka qenë e miratuar që në projekt dhe se në mes të flamujve shqiptar e turk, është logoja e kompanisë.

“Arsyeja… është për të treguar bashkëpunimin e vazhdueshme që në kemi pasur, edhe kompania me shtetin, por edhe me punonjësit që kanë qenë aty”, thotë Periku.

Ky hidrocentral është një nga 4 hidrocentralet që do të ndërtohen mbi lumenjtë Fan i Madh dhe Fan i Vogël nga kompania AYEN AS Energji SHPK, që është një bashkim kompanish turke me partnerë shqiptarë. Kurse leja për ndërtimin e hidrocentraleve është miratuar nga Këshilli i Rregullim Territorit në 20 dhjetor 2012. Edhe në të shkuarën banorët e zonave përreth hidrocentraleve kanë protestuar, por në të gjitha rastet thelbi i problemit kanë qenë pagesat për shpronësimin e tokave.

Ndërkohë që në jo pak raste drejtuesit e kompanisë i janë drejtuar me shkresa zyrtare qeverisë shqiptare për zgjidhjen e problemeve, përfshi edhe për ngjarjen e ndodhur më 31 dhjetor. Kjo ngjarje ka shkaktuar mjaft debate edhe në rrjete sociale.