Publikimi i fotove të Ergys Agasit pas arrestimit, AMP nis hetimet për Policinë e Tiranës!

Nuk ka kaluar pa pasoja publikimi i pamjeve pas arrestimit të të shumëkërkuarit për dosjen AKSHI-t nga SPAK, biznesmenit Ergys Agasi.

Pas javësh ndjekje, Forcat Operacionale të Policisë së Shtetit, në bashkëpunim me Byronë Kombëtare të Hetimit, vunë në pranga Ergys Agasin, i shpallur në kërkim nga SPAK në kuadër të hetimeve për çështjen e lidhur me Agjencinë Kombëtare të Shoqërisë së Informacionit.

Pas arrestimit, si Policia e Shtetit, ashtu edhe SPAK, reaguan zyrtarisht përmes njoftimeve për mediat, duke publikuar pamje dhe të dhëna lidhur me operacionin.

Në këto komunikime u respektuan standardet e vendosura prej vitesh për prezumimin e pafajësisë së personave nën hetim, ndërsa identiteti u paraqit me iniciale dhe fytyra u mbulua.

Respektimi i këtyre standardeve lidhet edhe me detyrimet që burojnë nga legjislacioni për mbrojtjen e të dhënave personale. Por ajo që pasoi më vonë, nuk vijoi sipas të njëjtave standarde.

Në media u bënë virale fotografi të Ergys Agasit, të shkrepura brenda automjetit të Policisë, gjatë transportimit të tij nga Durrësi drejt Tiranës. Fotografi të tjera të tij u publikuan edhe nga ambientet e shoqërimit në Drejtorinë Vendore të Policisë së Tiranës.

Publikimi i këtyre fotove ngre pikëpyetje mbi respektimin e rregullave për aksesin, administrimin dhe përpunimin e të dhënave personale, si edhe mbi detyrimin e punonjësve të Policisë për ruajtjen e konfidencialitetit.

Pikërisht për këtë arsye, këtë të enjte, Agjencia e Mbikëqyrjes Policore ka nisur një hetim administrativ, me qëllim identifikimin e personave që kanë realizuar dhe shpërndarë fotografitë e të arrestuarit.

Grupet e hetimit të AMP-së ndodhen në terren dhe po kryejnë verifikime lidhur me punonjësit e Policisë Tiranë, me fokus te mënyra se si janë realizuar, aksesuar dhe nxjerrë jashtë strukturave policore këto pamje.

Hetimi pritet të përcaktojë nëse fotografitë janë realizuar nga punonjës policie, kush ka pasur akses në ambientet dhe mjetet ku ndodhej i arrestuari dhe nëse ka pasur shkelje të rregullave për ruajtjen dhe përpunimin e të dhënave personale.

Në përfundim të verifikimeve, Agjencia e Mbikëqyrjes Policore pritet të reagojë zyrtarisht për rastin dhe të bëjë me dije rezultatet e hetimit administrativ.