“Rama ik”, ushton para Kryeministrisë

TIRANË – Protesta masive kundër qeverisë ka hyrë në një fazë të re përpara godinës së Kryeministrisë, ku pas marshimit të mijëra qytetarëve nga Sheshi “Skënderbej”, kanë nisur fjalimet e para të aktivistëve dhe pjesëmarrësve në tubim.

Në një atmosferë të ngarkuar me emocione dhe thirrje të vazhdueshme kundër qeverisë, protestuesit kanë mbushur bulevardin përballë selisë së ekzekutivit, duke valëvitur flamuj kombëtarë dhe pankarta me mesazhe kundër kryeministrit Edi Rama.

Një nga momentet më të forta të protestës erdhi kur një protestuese mori fjalën para turmës dhe vuri në dukje rritjen e vazhdueshme të pjesëmarrjes nga dita në ditë. Fjalët e saj u pritën me duartrokitje dhe brohoritje nga mijëra qytetarët e mbledhur.

“Jemi më shumë se dje e pardje! Çdo ditë do të jemi më shumë”, deklaroi ajo përmes megafonit, duke marrë menjëherë mbështetjen e protestuesve.

Menjëherë pas kësaj, turma shpërtheu në thirrjet ritmike “Rama ik”, të cilat për disa minuta dominuan atmosferën përpara Kryeministrisë. Slogani u përsërit nga qindra zëra njëkohësisht, duke u bërë refreni kryesor i mbrëmjes.

Organizatorët e protestës e kanë cilësuar pjesëmarrjen e sotme si më të madhen që nga nisja e lëvizjes qytetare një javë më parë. Sipas tyre, mbështetja po zgjerohet vazhdimisht dhe po përfshin qytetarë nga shtresa të ndryshme të shoqërisë, si dhe shqiptarë të diasporës që kanë organizuar aktivitete solidariteti në vende të ndryshme.

Ndërsa fjalimet vazhdojnë para godinës së Kryeministrisë, protestuesit deklarojnë se nuk kanë ndërmend të tërhiqen dhe se do të vazhdojnë mobilizimin deri në realizimin e kërkesave të tyre, të cilat përfshijnë anulimin e projekteve të kundërshtuara në Zvërnec dhe Nartë, mbrojtjen e pasurive publike dhe largimin e kryeministrit Edi Rama nga detyra.

Me çdo fjalim dhe çdo brohoritje, protesta po fiton intensitet, ndërsa organizatorët përsërisin mesazhin që dëgjohet gjithnjë e më shpesh në shesh: “Nesër do të jemi edhe më shumë.”