Rama në Shijak: Investuam në infrastrukturë për t’i parandaluar dhe minimizuar përmbytjet
Kryeministri Rama, gjatë inspektimeve të situatës së krijuar në vend si pasojë e reshjeve të ditëve të fundit, u ndal sot në Shijak, aty ku shtëpitë janë ende nën pushtetin e ujit.
Rama u tha banorëve se krahas dëmshpërblimit që iu bë familjeve të prekura nga përmbytjet e shkuara, janë rritur edhe investimet në infrastrukturë për t’i parandaluar dhe minimizuar ato.
“Si asnjëherë më parë, përmbytjet që ndodhën në fillim të vitit të kaluar, ne i kemi dëmshpërblyer plotësisht në të gjitha aspektet edhe për bagëtitë, shpendët, prodhimin. Plus, kemi likuiduar të gjitha detyrimet e prapambetura nga qeveria e mëparshme rreth 7milionë euro në Ultësirën e Shkodrës dhe prapë do bëjmë çmos që t’ju mbështesim. Ndryshimet klimaterike kanë sjellë kudo probleme të shtuara. Plus që ne kemi edhe koston e gjithë kësaj që kemi bërë 25 vjet; prit pyjet, shkatërro shtretërit e lumenjve, prish argjinatura, prish prita, prish ekuilibrin e natyrës dhe ndërto kuturu. Plus, projektet e bëra siç ishte rasti ku ishim më parë. Këto janë kostot. Kemi pastruar rreth 649 kilometra kanale që s’ishin prekur 20 e ca vjet, por ka akoma nevojë dhe do vazhdojmë këtë vit intensivisht me kanalet edhe për gjithë zonën e Durrësit, ku përfshihet edhe kjo zonë,” u shpreh Kryeministri.
Rama përsëriti edhe në Shijak se është domosdoshmëri qasja ndaj një mentaliteti të ri të biznesit dhe qytetarëve për sigurimin e pronës së tyre.
Kreu i qeverisë shoqërohej edhe nga ministrat e kabinetit të tij , Blendi Klosi e Saimir Tahiri, nga kryebashkiaku i Durrësit, Vangjush Dako dhe ai i Shijakut, Ardian Kokoma.
Ministri e Brendshëm Saimir Tahiri tha se “do të bëjmë edhe hartën e riskut. Pra, qytetarët ta dinë se banon këtu ku dikur ka qenë shtrati i liqenit, që ta dish se je i rrezikuar në shiun më të parë.
