Rama: Taksa e qarkullimit po iku nga nafta, do të shkojë drejtpërdrejt si taksë automjeti

TIRANË, 18 mars/ATSH-Maela Marini/ Kryeministri Edi Rama deklaroi sot se nëse taksa e qarkullimit hiqet nga çmimi i naftës do të vendoset në formën e taksës për automjetin.

Në një takim me furnizuesit e naftës, kryeministri iu përgjigj edhe kërkesave për heqjen e taksës së qarkullimit nga çmimi i karburantit.

“Ka një kërkesë tjetër që përsëritet në pafundësi dhe bëhet tamam si hesapet pa hanxhinë, që të ulet taksa e qarkullimit. Taksa e qarkullimit e vendosur në strukturën e çmimit të karburantit nuk është problem se ulet këtu, por po iku nga këtu do shkojë diku tjetër. Pra do të shkojë drejtpërdrejt te përdoruesi i automjetit në formën e taksës për automjetin”, u shpreh Rama.

Në një rast të tillë, kryeministri theksoi se kjo taksë do të katërfishohet deri edhe dhjetëfishohet në raste të veçanta.

“Ndërkohë sot nëse një përdorues mjeti nuk harxhon fare karburant nuk do të paguajë. Filozofia e taksës në strukturën e çmimit të karburantit është që ndotësit më të mëdhenj duhet të paguajnë më shumë në strukturën e çmimit”, shtoi Rama. //j.p/