Rama: “The Albanian Files” është një botim i pavarur, kritikat u nxitën nga një tekst autoironik

Kryeministri Edi Rama ka komentuar polemikat e krijuara rreth librit “The Albanian Files”, duke i cilësuar ato si të pabazuara dhe të nxitura nga keqinterpretimi i një teksti me natyrë autoironike.

Gjatë episodit të radhës të podkastit “Flasim”, Rama e nisi analizën e zhvillimeve të javës pikërisht me këtë botim, të cilin e konsideroi një nga publikimet më të rëndësishme të viteve të fundit në fushën e arkitekturës dhe zhvillimit urban.

“Është një ndër botimet më të rëndësishme të viteve të fundit, në dritën e skenës së arkitekturës dhe zhvillimit urban në Europë dhe në botë. Ka brenda punët, projektet, idetë dhe shënimet e 60 arkitektëve e studiove me reputacion të padiskutueshëm ndërkombëtar, të cilat i lidh së bashku Shqipëria”, u shpreh Rama.

Kreu i qeverisë hodhi poshtë pretendimet se libri është një projekt personal i tij, duke theksuar se ka kontribuar vetëm me një tekst hyrës në cilësinë e kryeministrit.

“Nuk është libri im. Unë kam dhënë vetëm një kontribut me një tekst parathënës, si kryeministër i Shqipërisë”, deklaroi ai.

Sipas Ramës, debati është frymëzuar nga “fryma e bulevardit”, duke iu referuar protestave të fundit, ndërsa kritikët i krahasoi me praktika të ngjashme me ato të Revolucionit Kulturor në Kinë.

“Është krijuar një degë inkuizicionale që përndjek me fjalë dhe shpifje një nga grupet më të rëndësishme të arkitektëve që i janë qasur Shqipërisë në këto 30 vite”, tha ai.

Rama shtoi se polemikat janë nxitur nga një tekst autoironik i një prej arkitektëve pjesëmarrës në botim, duke theksuar se kjo dëshmon pavarësinë editoriale të librit.

“Është kthyer kokë poshtë. Kjo tregon se libri është tërësisht i lirë dhe i pakontrolluar. Të gjithë autorët kanë pasur pavarësi të plotë në materialet e tyre”, u shpreh kryeministri.