Rekord historik në tregun valutor, çfarë ka ndodhur me euron në tre muajt e fundit

Vëllimi i tregtimit valutor në tregun e brendshëm arriti një rekord të ri historik në tremujorin e dytë të vitit sipas të dhënave të Bankës së Shqipërisë të cilat tregojnë se vlera e këmbimeve valutore arriti në gati 4.5 miliardë euro, një rritje me rreth 30% e krahasuar me të njëjtën periudhë të një viti më parë.

Volumi i këmbimeve valutore kaloi edhe vlerat e regjistruara në tremujorin e tretë të vitit të kaluar, periudhë e cila, për shkak të karakteristikave sezonale, shënon zakonisht volumet më të larta vjetore të këmbimeve valutore pasi këtë vit, këto vlera janë tejkaluar që në tremujorin e dytë, duke shënuar një rekord historik.

Pavarësisht rritjes së volumit të këmbimeve, që tregon rritje të ofertës për valutë në treg, leku vijoi trendin e tij mbiçmues edhe gjatë tremujorit të dytë të vitit.

Kursi mesatar i lekut kundrejt euros zbriti në 94.8 në muajin qershor, nga 96 në muajin mars, me një forcim mesatar mujor të lekut prej 0.4%. Në terma vjetorë, mbiçmimi i lekut u përshpejtua në 3.2% në tremujorin e dytë, nga 2.6% që ishte në tremujorin paraardhës.

Tendenca mbiçmuese u theksua më tej gjatë muajit korrik, ku në tre javët e para kursi mesatar EUR/LEK zbriti në 93.8, me një forcim vjetor prej 4.0%.

Ndërkohë, e njëjta tendencë po vazhdon edhe gjatë muajit gusht, kur kursi i këmbimit EUR/LEK ka zbritur në mënyrë të qëndrueshme poshtë kufirit të 93 lekëve, në vlerat minimale historike. Sipas kursit zyrtar të Bankës së Shqipërisë, të martën euro u këmbye me 92.76 lekë, niveli më i ulët i regjistruar ndonjëherë.

Banka e Shqipërisë vlerëson se rritja e volumeve të këmbimit valutor dhe, rrjedhimisht, edhe forcimi i vazhdueshëm i lekut, mbetet e lidhur ngushtë me ecurinë e bilancit të pagesave.