Renzi: Stabiliteti në Libi, zgjidhja e vetme për emigracionin

Kryeministri italian, Matteo Renzi, në vizitë në Uashington, reagoi të premten për emigrantët e mbytur këto ditët e fundit në Mesdhe, duke konfirmuar se problemi nuk mund të zgjidhet pa një stabilizim të situatës në Libi.

“Është një det, jo një varr”, deklaroi Matteo Renzi në një konferencë të përbashkët shtypi me Presidentin amerikan, Barack Obama, në Shtëpinë e Bardhë.

“E vetmja zgjidhje për emigracionin është paqja dhe stabilizimi i institucioneve libiane”, shtoi ai.

Duke përmendur situatën e sigurisë dhe stabilitetit, kryeqeveritari italian theksoi se të gjitha vendet e rajonit ishin të shqetësuara.

“Ne duhet të jemi më të vetëdijshëm për faktin se puna, që duhet të bëhet, i përket Libisë, por gjithashtu të gjithë Afrikës dhe do të thoja mbarë botës”, theksoi ai.

Përkrah tij, Presidenti Obama përmendi shqetësimin amerikan përballë krijimit të zonave të kontrolluara nga terroristët.

“DAESH-i kërkon me çdo kusht të përhapë kaos në Libi për të vendosur një pjesë të grupeve të tij atje”, theksoi lideri amerikan.

“Koordinimi me Italinë dhe partnerët e tjerë kyçë do të jetë shumë i rëndësishëm”, shtoi ai.