Rusia dëbon disa diplomatë hungarezë, u jep afat dy javë për t’u larguar

Ministria e Jashtme ruse njoftoi këtë të enjte se Rusia do të dëbojë një numër të papërcaktuar diplomatësh hungarezë. Ky vendim ka ardhur pasi Budapesti muajin e kaluar dëboi 10 diplomatë rusë.

“Si masë reciproke, një grup anëtarësh të stafit nga Ambasada Hungareze në Moskë dhe Konsullatat e Përgjithshme Hungareze në Shën Petersburg dhe Kazan duhet të largohen nga territori i Federatës Ruse brenda dy javësh”, tha ministria.

Ministria e Jashtme hungareze tha në një deklaratë se e pranoi vendimin e Rusisë, duke shtuar: “Hungaria nuk është e interesuar në një përshkallëzim të tensionit diplomatik”.

Hungaria i kishte akuzuar diplomatët rusë që i kishte dëbuar se kishin vepruar në mënyra të papajtueshme me statusin e tyre -formulim që shpesh përdoret si kod për spiunazh. Ky veprim ishte një sinjal i qartë se epoka pro-ruse e ish-kryeministrit Viktor Orban ka mbaruar.

Orban, i cili humbi pushtetin në prill pas 16 vitesh në detyrë, kishte mbajtur lidhje të ngushta me Presidentin rus Vladimir Putin edhe pasi Rusia pushtoi Ukrainën në vitin 2022, duke vazhduar të blinte naftë dhe gaz rus pavarësisht sanksioneve të Bashkimit Evropian.

Kryeministri i ri Peter Magyar dhe qeveria e tij e qendrës së djathtë kanë thënë vazhdimisht se aleancat kryesore të Hungarisë janë Bashkimi Evropian dhe NATO dhe se qeveria synon të rindërtojë besimin e dëmtuar nën sundimin e Orbanit.