Seanca e dytë në themel ndaj Metës, nuk ka transmetim live – Tv Klan

Këtë të hënë, 11 maj ka nisur seanca në e dytë në themel për Ilir Metën. Seanca nisi me debat pasi nga palët u kërkua transmetimi live i seancës, Meta e ka përsëritur shpesh herë këtë kërkesë, por kjo u rrëzua nga gjykata.

“Çdo shtetas i kësaj republike ka të drejtë të vijë ta ndjekë gjykimin. Por e kemi vendosur qe kamerat do qëndrojnë fare pak”, argumenton gjykata.

“Kërkesë qe doja ta bëja në prani të kamerave. Në nenin 339 dhe në konventën europiane dhe duke nisur nga koha e diktaturës, proceset e rëndësisë së veçanta duke nisur nga grupet armiqësore të Enver Hoxhës janë bërë radhë në altoparlantë”, shprehet avokati i Metës në debat e sipër.

Në seancë është i pranishëm ish-presidenti Ilir Meta, i cili në një foto të siguruar nga gazetarja e kronikës në Klan News, Glidona Daci shihet teksa komunikon me avokatin e tij përmes kafazit të xhamit.

E pranishme në seancë ishte edhe Monika Kryemadhi, Ema Çoku, Piro Xhixho dhe Fatime Kryemadhi.

Kujtojmë se më 24 mars, Meta ofroi një garanci prej 50 mijë eurosh në kërkim të lirimit të tij, por Gjykata Kundër Korrupsionit dhe Krimit të Organizuar e rrëzoi këtë kërkesë të ish-kreut të shtetit, duke e lënë në burg.

Meta akuzohet për tre vepra penale, të cilat iu komunikuan më 4 gusht 2025, sa i përket dosjes CEZ/DIA dhe lobimit në SHBA. Ai akuzohet për fshehje pasurie, pastrim parash dhe korrupsion.

Ai ndodhet në paraburgim që prej tetorit të vitit 2024, ndërsa Kryemadhi është nën masën e detyrimit për paraqitje. Dosja “Meta” përfshin gjithashtu hetime ndaj nënës së Kryemadhit, Pirro Xhixhos dhe Ema Çokut.

Të pandehurit akuzohen për disa vepra penale, përfshirë korrupsionin pasiv, pastrimin e parave dhe mosdeklarimin e pasurive.

/tvklan.al