SHBA dhe Irani përballë negociatave vendimtare! A ka rrezik për rikthim të konfliktit?

Shtetet e Bashkuara dhe Irani po hyjnë në negociata me një “antagonizëm të thellë” ndaj njëri-tjetrit dhe me një “dëshpërim të ndërsjellë” për të dalë fitues politikisht, sipas Samir Puri, lektor vizitor në King’s College London.

Në një intervistë për Al Jazeera, Puri tha se Irani është dobësuar ndjeshëm pas javësh përleshjesh intensive dhe tani përballet me zgjedhjen mes gjetjes së një zgjidhjeje diplomatike ose rikthimit në një konflikt të plotë ushtarak.

“Pyetja kryesore është nëse është më mirë të gjendet një rrugëdalje diplomatike apo të rrezikohet rikthimi i luftimeve në shkallë të gjerë,” u shpreh ai.

Sipas Purit, mundësia më e mirë për uljen e tensioneve është arritja e një marrëveshjeje mbi pasurimin bërthamor. Ai theksoi se Irani duhet të pranojë një marrëveshje që nuk shihet si dorëzim i madh nga ana e tij, ndërsa SHBA-ja duhet të jetë në gjendje ta paraqesë atë si një sukses diplomatik.

Eksperti shtoi se një tjetër çështje kyçe mbetet ngushtica e Hormuzit, e cila konsiderohet edhe më e ndërlikuar sesa programi bërthamor iranian. Kjo rrugë detare është ndër më të rëndësishmet për transportin global të naftës dhe çdo tension aty mund të ndikojë drejtpërdrejt në tregjet ndërkombëtare.