SHBA – Gjykata Supreme rrëzon kufizimet e Trump për votimin me postë

UASHINGTON, 15 shtator / ATSH-ANSA/ – Gjykata Supreme e Shteteve të Bashkuara ka rrëzuar kufizimet që administrata e presidentit Donald Trump synonte të vendoste mbi votimin me postë.

Vendimi përbën një nga goditjet më të rëndësishme të viteve të fundit ndaj administratës Trump në një çështje që lidhet me procesin zgjedhor

Vetëm dy gjyqtarë konservatorë, Samuel Alito dhe Clarence Thomas, votuan kundër vendimit të shumicës.

Në vendimin e saj të shkurtër, Gjykata Supreme deklaroi se është “e pamundur” që administrata të ketë sukses në themel të çështjes së saj lidhur me procedurën e kundërshtuar.

Administrata Trump kishte kërkuar që shtetet të hartonin lista me të gjithë votuesit që duhet të merrnin fletën e votimit me postë.

Sipas administratës, bëhej fjalë për një ndryshim të kufizuar të rregullave postare, i cili synonte parandalimin e mashtrimeve të pretenduara në votime.

Megjithatë, dy gjykata më të ulëta e kishin bllokuar masën, duke argumentuar se iniciativa përbënte një zgjerim antikushtetues të kompetencave të pushtetit federal.

Gjykatat kishin vënë gjithashtu në dyshim aftësinë e Shërbimit Postar të SHBA-së për ta zbatuar plotësisht këtë procedurë.

Vendimi i Gjykatës Supreme i jep kështu një goditje përpjekjes së administratës Trump për të ndryshuar mënyrën e administrimit të votimit me postë në Shtetet e Bashkuara.