SHBA – Senati konfirmon Blanche, ish-avokatin e Trumpit, si Prokuror të Përgjithshëm

UASHINGTON, 8 gusht /ATSH-AFP/ – Senati amerikan ka konfirmuar sot Todd Blanche, ish-avokatin personal të presidentit Donald Trump, në postin e Prokurorit të Përgjithshëm të SHBA-së, i cili është njëkohësisht edhe sekretar i Departamentit amerikan të Drejtësisë.

Blanche u miratua me 50 vota pro dhe 49 kundër, ndërsa republikanët kontrollojnë Senatin me një shumicë të ngushtë.

Blanche kishte ushtruar tashmë detyrën e Prokurorit të Përgjithshëm në mënyrë të përkohshme, pasi Trump shkarkoi Pam Bondin në prill.

Përpara se të hynte në administratë, ai ishte një nga avokatët më të afërt të presidentit Trump dhe e përfaqësoi atë në disa çështje penale.

Demokratët e kundërshtuan fuqishëm emërimin, duke argumentuar se lidhja e ngushtë personale e Blanche me Trumpin rrezikon pavarësinë e Departamentit të Drejtësisë.

Senatori demokrat Dick Durbin tha se Prokurori i Përgjithshëm duhet të jetë avokat i popullit, ndërsa akuzoi Blanche se po e trajton Departamentin e Drejtësisë si një firmë ligjore që i shërben vetëm presidentit.

Konfirmimi u shoqërua edhe me debate brenda radhëve republikane.

Një nga çështjet kryesore ishte një fond prej 1,8 miliardë dollarësh, i propozuar për personat që Trump i konsideron viktima të ndjekjeve penale të politizuara.

Fondi mund të përfshinte edhe persona të dënuar për trazirat e 6 janarit 2021 në Capitol Hill.

Një tjetër pikë e diskutueshme ishte një marrëveshje që do t’i jepte Trumpit imunitet ndaj kontrolleve tatimore./ /Ad.Ab./ a.jor.