SHBA – Trump kërcënon BE-në me tarifa të larta pas gjobës ndaj “Google”

UASHINGTON, 24 korrik /ATSH-DPA/- Presidenti i SHBA-së, Donald Trump ka kërcënuar se do të vendosë tarifa të larta ndaj importeve nga Bashkimi Evropian, pasi blloku evropian i vendosi një gjobë të madhe kompanisë amerikane “Google”.

“Bashkimi Evropian do të paguajë një çmim shumë të lartë për këtë veprim, të cilin e konsideroj të paligjshëm dhe joetik. Do të ndërmarrim masa për t’iu kundërpërgjigjur, duke vendosur sa më shpejt tarifa të larta ndaj importeve nga BE-ja. Prisni zhvillimet e ardhshme”, shkroi Trump në platformën e tij “Truth Social”.

Ai njoftoi gjithashtu se administrata amerikane do të nisë një hetim për atë që e cilësoi si praktikë të “grabitjes” së kompanive amerikane dhe, rrjedhimisht, të taksapaguesve amerikanë.

Kërcënimi i Trump pritet të mbështetet në Nenin 301 të Ligjit Amerikan për Tregtinë të vitit 1974, i cili i jep qeverisë kompetencën të vendosë masa, përfshirë tarifa doganore, nëse konstaton se partnerët tregtarë ndjekin praktika të padrejta, të paarsyeshme ose diskriminuese.

Megjithatë, ligji kërkon fillimisht zhvillimin e hetimeve, mbledhjen e deklaratave dhe organizimin e seancave dëgjimore.

Ndërkohë, të enjten, përfaqësuesi i SHBA-së për Tregtinë, Jamieson Greer, vendosi tarifa të reja ndaj rreth 60 partnerëve tregtarë, pjesërisht duke u bazuar në të njëjtin nen ligjor, me argumentin se nuk kishin marrë masa të mjaftueshme kundër punës së detyruar.

Po të enjten, Komisioni Evropian gjobiti “Google” me 890 milionë euro (rreth 1 miliard dollarë) për shkelje të rregullave të konkurrencës.

Sipas Komisionit, kompania abuzoi me pozitën e saj përmes motorit të kërkimit dhe aplikacioneve në “Google Play”, duke dëmtuar në mënyrë të paligjshme konkurrentët e saj. /