“Shkodra pret më shumë turistë këtë vit”, gazetari: Rritje deri në 25% e vizitorëve

Gazetari Teodor Gjerga raportoi nga Shkodra për emisionin “Now me Erla Mëhillin” mbi ecurinë e sezonit turistik në këtë qytet dhe zonat përreth.

Sipas tij, këtë vit është shënuar një rritje e numrit të turistëve si në qytetin e Shkodrës, ashtu edhe në të gjitha pikat turistike të qarkut.

“Ka pasur një rritje të shifrave të turistëve si në qytetin e Shkodrës, por edhe përgjatë të gjithë siteve turistike në qarkun Shkodër. Vetëm në qytetin e Shkodrës raportohen rreth 15-25% turistë më shumë në krahasim me të njëjtën periudhë të një viti më parë”, tha Gjerga.

Ai u shpreh se shifra pozitive raportohen edhe nga plazhi i Velipojës, i cili është një nga pikat turistike me numrin më të madh të vizitorëve ndërsa edhe Thethi vijon të jetë një nga destinacionet kryesore të turizmit malor në Shqipëri.

“Sipas njësive akomoduese, prenotimet janë shumë të mira edhe për fundin e muajit korrik, por edhe për muajin gusht. Operatorët turistikë duken optimistë për një sezon turistik që ka nisur pak më herët se vitet e kaluara dhe që pritet të zgjasë deri në muajin shtator”, u shpreh Gjerga.