Shqipëria, drejt përmbushjes së objektivit. Konsolidon vendin e tretë

Ajo me Maqedoninë e luajtur në Strumicë ishte një ndeshje që duhej fituar, megjithatë Kombëtarja shqiptare nuk shkoi më shumë sesa një barazim 1-1. Gjithsesi është një pikë që na lë në vendin e tretë në grupin G të kualifikueseve të Botërorit “Rusi 2018”, e probabiliteti që kjo situatë të jetë deri në fundin e kësaj fushate kualifikuese është i madh.

Spanja dhe Italia ishin padyshim “padronët” e këtij grupi dhe për kuqezinjtë, objektivi ishte pikërisht ky vend i tretë. Duke parë çfarë ka ndodhur deri tani, ai është drejt arritjes.

Kombëtarja shqiptare, pas rezultatit 1-1 me Maqedoninë është në kuotën e 13 pikëve, e shkëputur 4 pikë nga Izraeli, i cili në të njëjtën ditë pësoi humbje ndaj Italisë 1-0, ndërsa vet maqedonasit janë larg çdo lloj pretendimi për këtë pozicion, pasi në 8 ndeshje të luajtura kanë mundur të grumbullojnë vetëm 7 pikë.

Duket se Kombëtarja, në këtë pikë favorizohet edhe nga kalendari i radhës së kundërshtarëve të saj. Në 6 tetor, Shqipëria do të udhëtojë drejt Spanjës, për të luajtur ndeshjen me iberikët, që tashmë janë me një këmbë në fazën finale të Botërorit, ndërsa Izraeli do të udhëtojë drejt Lihtenshtajnit, me izraelitët që e kanë të fituar, të paktën në letër, takimin.

Ndeshja e fundit do të jetë ajo që do të japë verdiktin final, me Kombëtaren shqiptare që do të presë Italinë, e Izraelin që do të presë Spanjën. Por skuadra e Lopeteguit, shpesh ka treguar se nuk i nënvlerëson kundërshtarët, edhe kur i ka arritur synimet e saj.

Ky është një vend i tretë, që ashtu siç e deklaroi edhe presidenti i Federatës Shqiptare të Futbollit, Armand Duka, do t’i japë më shumë forcë skuadrës sonë kombëtare për të përballuar kualifikueset e Europianit të vitit 2020.