Shtohen fluturimet Pragë-Tiranë, i japin nxitje turizmit

Ministrja e Zhvillimit Ekonomik, Sipërmarrjes dhe Turizmit, Milva Ekonomi në një takim të premten me ministren e Zhvillimit Rajonal të Çekisë, Karla Šlechtová vuri në dukje rritjen e numri të turistëve çekë në Shqipëri, sidomos të atyre që preferojnë turizmin malor. Sipas saj, numri i çekëve që kanë vizituar vendin tonë në 2015 ishte 15.700, kundrejt 9300 të turistëve që numërohen në vitin 2012.

Në një postim në Facebook, ministrja Ekonomi, shkruan se nisja e vizitës së ministres çeke në Tiranë përkoi dhe me mbërritjen e charterit të parë të turistëve nga Praga, për këtë sezon turistik.
Ndryshe nga vitet e tjera, kur ne kishim një charter për çdo javë, duke nisur nga dje e deri në shtator fluturimet do të jenë me dy chartera në javë, që vijnë nga Çekia. Në këtë kuadër, ne vlerësojmë se fluturimet Pragë-Tiranë do të japim një nxitje të mëtejshme të zhvillimit të turizmit dhe të kontakteve njerëzore midis dy vendeve tona, por padyshim do të rrisin edhe volumin tregtar midis nesh, citohet postimi në FB i ministres së Ekonomisë.