Situatë kritike në Librazhd! Zjarri i madh përfshin masivin pyjor, flakët i afrohen banesave në Xhyrë

Është paraqitur kritike situata nga zjarret pasditen e kësaj të enjteje në Bashkinë Librazhd, ku një zjarr i përmasave të mëdha ka përfshirë një masiv pyjor me akacie dhe shkurre në zonën midis fshatrave Xhyrë dhe Vehçan, në Njësinë Administrative Hotolisht.

Mësohet se, vatra e zjarrit, e cila ka nisur që prej mesditës, është përhapur me shpejtësi në disa drejtime, duke djegur një sipërfaqe të konsiderueshme. Përhapja e flakëve është favorizuar nga bimësia e thatë dhe terreni i vështirë.

Situata është përshkallëzuar veçanërisht pas orës 17:00, kur flakët i janë afruar me shpejtësi banesave në zonën e ish-stacionit hekurudhor të Xhyrës, si dhe aksit kombëtar Librazhd-Prrenjas.

Për shkak të rrezikut për zonat e banuara, në terren janë mobilizuar dhjetëra mjete dhe forca të shërbimit zjarrfikës nga Librazhdi, Elbasani, Gramshi dhe Cërriku. Grupet e ndërhyrjes po punojnë me intensitet për të frenuar avancimin e zjarrit dhe për të mbrojtur shtëpitë dhe objektet pranë vatrës.