Spalletti kërkon një organizator, Juventusi ia vë syrin Jasharit për të forcuar mesfushën

Merkatoja nuk pret fundin e garës për Champions. Te Juventusi vazhdojnë mbledhjet për të ndërtuar skuadrën e re sipas dëshirave të trajnerit Luciano Spalletti. Mes emrave të analizuar është Ardon Jashari i Milanit, kundërshtar në sfidën e fundit në “San Siro”.

Spalletti kërkon një Juventus më me përvojë dhe karizmatik, por edhe më teknik në mesfushë. Përveç pistave si Alisson dhe Bernardo Silva, drejtuesit synojnë të shtojnë një tjetër element, jo si zëvendësues i Manuel Locatelli, por si alternativë taktike. Locatelli mbetet i paprekshëm në skemat 4-2-3-1 dhe 3-4-3, por po mendohet edhe një 4-3-3 për sezonin e ri. Në këtë kuadër, Jashari shihet si profil i përshtatshëm.

Shqiptaro-zvicerani ishte në radar edhe sezonin e kaluar te Bruges, por Milani e bleu për 34 milionë euro, plus bonuse, me insistimin e Igli Tares. Një dëmtim i rëndë në fillim e frenoi, duke bërë që të ketë vetëm 13 paraqitje dhe 657 minuta. Kjo situatë ka rritur interesin e Juventusit. Në listë mbetet edhe Hojbjerg, ndërsa synohet të mbahet Thuram dhe pritet largimi i Koopmeiners, i kërkuar nga Galatasaray dhe klube angleze.