SPANJË – Policia shkatërron një rrjet trafikimi që shfrytëzonte seksualisht vajza të reja migrante

MADRID, 11 gusht /ATSH-AFP/ – Policia spanjolle ka shkatërruar një rrjet kriminal që dyshohet se rekrutonte vajza të reja migrante, përfshirë të mitura të pashoqëruara, nga qendrat e pritjes në Ishujt Kanarie dhe i dërgonte drejt Spanjës kontinentale dhe Francës, ku disa prej tyre shfrytëzoheshin seksualisht.

Hetimi nisi pasi një vajzë migrante, e cila fillimisht ishte marrë në kujdes nga autoritetet në Gran Kanaria, u kthye nga Franca në Spanjë dhe u tregoi policëve se ishte rekrutuar me premtimin për një vend pune.

Hetuesit identifikuan më pas raste të tjera vajzash që ishin larguar nga qendrat e pritjes pa marrë dokumentet e tyre dhe më vonë gjurmët e tyre ishin gjetur në fluturime drejt Spanjës kontinentale.

Sipas “Guardia Civil”, rrjeti shfrytëzonte cenueshmërinë e vajzave të reja, duke i transferuar në Spanjë dhe Francë, ku disa prej tyre përfundonin në shfrytëzim seksual.

Policia ka shpëtuar dy viktima dhe ka parandaluar largimin e katër të miturave të tjera nga qendrat e pritjes në Ishujt Kanarie.

Pas kontrolleve në Gran Kanaria, pesë persona u arrestuan, mes tyre edhe një i mitur.

Autoritetet po vijojnë hetimet për të zbardhur plotësisht aktivitetin e rrjetit dhe për të identifikuar viktima të tjera të mundshme.

Operacioni zhvillohet në një moment kur çështja e migracionit është rikthyer në qendër të debatit në Evropë.

Në fund të korrikut, rreth 72 mijë migrantë kaluan me forcë kufirin nga Maroku drejt Ceutës, në Afrikën e Veriut. Shumica janë kthyer më pas në Marok, ndërsa qindra të mitur të pashoqëruar kanë mbetur në territorin spanjoll. /Ad.Ab./ a.jor.