Sulmet ruse vrasin 14 ukrainas, mbi 100 të plagosur

Rusia lëshoi qindra dronë dhe dhjetëra raketa ndaj Kievit dhe qyteteve të tjera ukrainase gjatë natës, duke vrarë të paktën 14 civilë dhe duke plagosur më shumë se 100 të tjerë, thanë autoritetet të martën.

Disa persona mbetën të bllokuar nën rrënojat e ndërtesave të banimit, përfshirë një fëmijë 3-vjeçar, trupi i të cilit u nxor nga ekipet e emergjencës në qytetin Dnipro të Ukrainës qendrore, thanë zyrtarët, ndërsa sulmi zgjati nga nata deri në ditë dhe shpërthimet u dëgjuan në shumë qytete.

Banorët e Kievit kishin qenë në alarm prej ditësh, pasi Rusia kishte paralajmëruar për një sulm masiv ajror dhe u kishte kërkuar diplomatëve të huaj të largoheshin nga kryeqyteti ukrainas. Megjithatë, askush nuk dukej se e kishte marrë seriozisht këtë thirrje, sipas Associated Press, transmeton KosovaPress.

“Një sulm në shkallë të gjerë dhe një deklaratë e hapur nga Rusia: nëse Ukraina nuk mbrohet nga raketat balistike dhe sulmet e tjera raketore, këto sulme do të vazhdojnë”, tha Presidenti Volodymyr Zelensky, duke reaguar ndaj sulmit dhe duke kërkuar më shumë mbështetje nga SHBA dhe vendet evropiane.

Presidenti Vladimir Putin ka intensifikuar fushatën ajrore të Moskës ndaj Ukrainës, me forcat ruse që së fundmi kanë përdorur për herë të tretë në katër vite luftë një raketë balistike hipersonike Oreshnik.