Tabaku: Familjet shqiptare e mbyllin muajin me borxh, ndërsa korrupsioni rëndon koston e jetesës dhe pasuron pakicën!

Deputetja e Partisë Demokratike, Jorida Tabaku, e lidhi rritjen e kostos së jetesës me korrupsionin dhe mënyrën si shpërndahen paratë publike.

Në videon e publikuar në rubrikën “Këndi i Javës”, ajo krahasoi vështirësitë e familjeve që jetojnë me pagë me përfitimet që, sipas saj, u shkojnë një rrethi të privilegjuar pranë pushtetit.

Tabaku tha se fillimi i shkollës u ka shtuar familjeve shpenzime prej 11 mijë deri në 40 mijë lekësh për çdo fëmijë. Këto kosto, sipas saj, i shtohen ushqimit, qirasë, transportit dhe energjisë në një kohë kur pagat nuk po e përballojnë rritjen e çmimeve.

Duke iu referuar llogaritjeve që paraqiti në video, deputetja tha se një familjeje me dy paga minimale i shkon rreth 90% e të ardhurave për ushqimet bazë dhe qiranë. Për të mbuluar shpenzimet e tjera, sipas saj, familja mund ta mbyllë muajin me rreth 43 mijë lekë borxh. Ajo solli edhe shembullin e një familjeje me të ardhura mujore prej rreth 130 mijë lekësh, për të cilën llogariti një mungesë prej rreth 9 mijë lekësh në fund të muajit.

“Ky është realiteti i familjeve shqiptare që jetojnë me pagën e tyre”, u shpreh Tabaku. Ajo kundërshtoi mënyrën si qeveria e paraqet rritjen ekonomike, duke argumentuar se përfitimet e saj nuk po ndihen në buxhetin e përditshëm të qytetarëve.

Deputetja përmendi tenderët, koncesionet dhe rastet që, sipas saj, ilustrojnë lidhjen mes korrupsionit dhe pabarazisë.

Tabaku e cilësoi korrupsionin si një barrë që përfundon te qytetarët dhe kërkoi ndryshimin e një sistemi që, sipas saj, favorizon pakicën ndërsa varfëron familjet shqiptare.