TAJLANDË – Shtatë të vdekur pas të shtënave të një adoleshenti në një shkollë

BANGKOK, 7 gusht /ATSH-DPA/ – Të paktën shtatë persona u vranë dhe disa të tjerë u plagosën pas të shtënave me armë në një shkollë në Tajlandë, raportuan mediat lokale të premten.

Gazeta ”Khaosod”, duke cituar autoritetet lokale të menaxhimit të fatkeqësive, tha se besohet se të vdekurit përfshijnë tre mësues, tre studentë dhe adoleshentin e armatosur.

Motivi fillimisht ishte i paqartë.

Të shtënat ndodhën në mëngjes në shkollën ”Debsirin Nonthaburi” në provincën Nonthaburi, në veri të Bangkokut.

Sipas hetimeve fillestare, i dyshuari i armatosur ishte një student.

Forcat e sigurisë thanë se ai me sa duket qëlloi veten pas sulmit.

Paniku shpërtheu midis studentëve dhe mësuesve brenda ndërtesës, sipas raportit.

Policia dhe shërbimet e emergjencës u vendosën në numër të madh, ndërsa studentët, mësuesit dhe stafi tjetër u evakuuan nga kampusi.

Autoritetet e menaxhimit të fatkeqësive thanë se 15 persona ishin plagosur, të paktën njëri prej tyre në gjendje kritike./ a.jor.