Tensione në Qafë Thanë, ndalohet kamioni me pëllumba garues! Pas protestës lejohet kalimi drejt Serbisë

Debate të ashpra janë zhvilluar këtë të diel në Pikën Kufitare të Qafë Thanës mes autoriteteve doganore shqiptare dhe përfaqësuesve të shoqatës së pëllumbave bashkë me anëtarët e saj, pasi nuk është lejuar kalimi i një kamioni me pëllumba drejt Serbisë, ku pritet të zhvillohen gara ndërkombëtare.

Përfaqësuesit e shoqatës kanë kundërshtuar vendimin, duke kërkuar që të mos pengohen dhe të lejohen të marrin pjesë në aktivitet. Sipas tyre, kërkesa e bërë nga Fidel Ylli nuk ka bazë ligjore dhe nuk mund të përdoret për të ndaluar kalimin apo pjesëmarrjen e pëllumbave në garë.

Debatet kanë nisur që në orët e para të mëngjesit dhe situata vijon të mbetet e tensionuar. Anëtarët e shoqatës deklaruan se nuk do të tërhiqen deri në zgjidhjen e plotë të situatës nga autoritetet përgjegjëse.

Pas disa orësh diskutime dhe negociata me autoritetet, dogana reflektoi duke lejuar kalimin e kamionit me pëllumba drejt Serbisë.

Përfaqësuesit e shoqatës e cilësuan vendimin si një zgjidhje të drejtë, ndërsa thanë se pjesëmarrja në këto gara përfaqëson jo vetëm pasionin për sportin e pëllumbave garues, por edhe përfaqësimin e Shqipërisë në aktivitete ndërkombëtare.

Sporti i pëllumbave garues është një aktivitet tradicional që zhvillohet në shumë vende të Evropës dhe bazohet në aftësinë orientuese dhe shpejtësinë e pëllumbave në gara në distanca të gjata.