Tetovë: u zbardh rasti i videos me djegien e flamurit maqedonas në TikTok — katër të mitur të përfshirë

Policia e Tetovës ka zbardhur plotësisht rastin e videos së publikuar në rrjetin social TikTok, në të cilën digjej flamuri maqedonas. Rastin e ka trajtuar Njësia për krim kompjuterik pranë Sektorit për Punë të Brendshme të Tetovës, në koordinim me Sektorin për krim kompjuterik dhe forenzikë dixhitale në Ministrinë e Punëve të Brendshme.

Sipas njoftimit zyrtar, më 22 shtator 2026, gjatë monitorimit të rrjeteve sociale, oficerët e policisë zbuluan videon inkriminuese, për të cilën u konstatua vepra penale “nxitje e urrejtjes, përçarjes ose jotolerancës mbi baza kombëtare, fetare dhe diskriminuese”, e parashikuar në nenin 319, paragrafi 1 i Kodit Penal.

Një ditë më vonë, më 23 shtator, u identifikua autori i profilit nga i cili ishte postuar videoja — një i mitur nën moshën 14 vjeç nga Tetova. Biseda zyrtare me të miturin u zhvillua në prani të prindit dhe përfaqësuesve të Qendrës për Punë Sociale në Tetovë, gjatë së cilës ai e pranoi kryerjen e veprës.

Me pëlqimin e prindit, policia sekuestroi telefonin celular nga i cili ishte postuar videoja, për dokumentimin e provave materiale. Gjatë bisedës, i mituri përmendi edhe tre të mitur të tjerë që kishin marrë pjesë në ngjarje; ata do të thirren në stacionin policor.

Pas dokumentimit të plotë të rastit, policia do t’i dorëzojë parashtresën përkatëse Prokurorisë Themelore Publike të Tetovës.

Burimi: Makfax