Tiranë: 27 deri 31 Maj 2016, Asambleja Parlamentare e NATO-s

Kuvendi i Shqipërisë u është drejtuar të gjithë operatorëve ekonomikë të interesuar për realizimin e një tenderi për eventin e Asamblesë Parlamentare të NATO-s. Fondi limit është 33.767.601 lekë pa TVSH. Kurse qëllimi i kontratës është: “Shërbimi i organizimit të aktivitetit parlamentar si dhe sigurimi i pajisjeve të nevojshme për mbarëvajtjen e eventit të Asamblesë Parlamentare të NATO-s, i cili do të mbahet në ambientet e Pallatit të Kongreseve gjatë periudhës 27 deri 31 Maj 2016”. Objekti i këtij shërbimi është organizimi i aktivitetit parlamentar, sigurimi i pajisjeve audio-video, kompjuterë, printerë, fotokopje, materiale kancelarie si dhe shërbime asistence për mbarëvajtjen e eventit të Asamblesë Parlamentare të NATO-s”. Stafi i Sekretariatit të NATO-s do të fillojë punë një javë përpara aktivitetit për përgatitjen e eventit, për këtë kërkohet që printerët, fotokopjet, serverët, kompjuterët duhet të jenë instaluar dhe testuar dy ditë para ardhjes së tyre. Mbërritja e stafit do të jetë në 23 maj. Pajisjet audiovizuale bashkë me kabinat e përkthimit duhet të jenë të instaluara dhe testuar dy ditë para fillimit të aktivitetit (data e fillimit të aktivitetit 27 maj).

Mbajtja në Tiranë e Asamblesë Parlamentare të NATO-s, ka rëndësi të veçantë për Shqipërinë dhe për krejt rajonin. Sipas z.Pandeli Majko, antar i Asamblesë Parlamentare e NATO-s, në Tiranë do të jenë rreth 700 pjesëmarrës dhe Sekretari i Përgjithshëm i NATO-s.