U gjet i pajetë pranë një lumi, arrestohet 16-vjeçari për vrasjen e të miturit në Francë

Autoritetet franceze kanë vënë në pranga një 16-vjeçar pasi dyshohet si autori i vdekjes së një djali 12-vjeçar. I mituri u gjet i vdekur të dielën në qytetin e Rennes, Francë.

Zyra e prokurorit njoftoi se 16-vjeçari mbetet në paraburgim, ndërsa hetimet vazhdojnë për të përcaktuar rrethanat e sakta të rastit.

Trupi i 12-vjeçarit u zbulua të dielën pasdite kur një peshkatar dëgjoi të qarat e fëmijës pa qenë në gjendje të përcaktonte se nga vinin. Ai menjëherë njoftoi policinë, e cila nxitoi në vendngjarje dhe e gjeti 12-vjeçarin të vdekur në shkurre pranë lumit Vilaine.

Sipas të njëjtave informacione nga hetimi, një peshqir i lagur ishte i lidhur rreth qafës së fëmijës. Shpëtimtarët që mbërritën në vendngjarje nuk mundën ta shpëtonin.