U kap me municione dhe armë zjarri pa leje, vihet në pranga 21-vjeçari në Elbasan

Një 21-vjeçar është vënë në pranga nga Policia e Elbasanit, pasi u kap i armatosur këtë të enjte.

Sipas raportimeve të policisë, në pranga ka rënë J. S., 21 vjeç, i cili lëvizte me armë zjarri pistoletë me vete, në afërsi të parkut “Aqif Pasha”.

Mësohet se 21-vjeçari e kishte armën pa leje, ndërsa gjatë kontrollit iu gjetën gjithashtu dhe municione.

“Në vijim të punës intensive operative dhe operacionale, kryer me qëllim identifikimin dhe ndalimin e shtetasve të cilët përbëjnë rrezik për përfshirje në ngjarje kriminale, është siguruar informacion për një shtetas që lëvizte me armë zjarri (pistoletë) me vete, në afërsi të parkut “Aqif Pasha”.

Si rezultat i ndërhyrjes së menjëhershme të shërbimeve të Komisariatit të Policisë Elbasan, në kuadër të operacionit të koduar “Indicia”, u vu në pranga shtetasi i dyshuar, J. S., 21 vjeç, banues në Elbasan.

Gjatë kontrollit në çantën (marsup) të këtij shtetasi, u gjet 1 armë zjarri (pistoletë) me municion, të cilën ai e posedonte pa leje”, thuhet në njoftimin e policisë.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.