UASHINGTON – SHBA sulmon një tanker me flamur panamez që po i afrohej Iranit

UASHINGTON, 11 gusht /ATSH-DPA/ – Ushtria amerikane ka sulmuar një tanker me flamur panamez në Gjirin e Omanit, me qëllim që ta pengonte të vazhdonte drejt një porti iranian, njoftoi sot Komanda Qendrore e SHBA-së (CENTCOM).

Sipas CENTCOM, një helikopter i marinës amerikane lëshoi dy raketa “Hellfire” ndaj anijes së mallrave M/V Vela Nova, pasi ekuipazhi civil nuk iu bind disa paralajmërimeve të përsëritura nga forcat amerikane.

Në momentin e raportimit nuk ishte e qartë nëse kishte persona të plagosur ose viktima.

Incidenti u raportua më herët edhe nga “UK Maritime Trade Operations”, e cila njoftoi për një përplasje në Gjirin e Omanit që përfshinte një anije dhe forca ushtarake, pa dhënë detaje të mëtejshme.

SHBA-ja riktheu në mesin e korrikut bllokadën detare ndaj porteve iraniane, në përpjekje për të ushtruar presion mbi Teheranin që të rihapë Ngushticën e Hormuzit dhe për të kufizuar të ardhurat e Iranit nga eksportet e naftës.

Forcat amerikane kanë qëlluar edhe më parë ndaj anijeve që tentonin të lundronin drejt porteve iraniane dhe kanë detyruar disa cisterna të ndryshojnë kurs. /Ad.Ab./ a.jor.