Ulja e tatimfitimit për bizneset, Rama viziton një prej sipërmarrësve

Paketa e re fiskale ka hyrë në fuqi nga 1 janari, e në bazë të saj, bizneset me xhiro vjetore nga 8 deri në 14 milionë lekë do të përfitojnë ulje të taksës së tatimfitimit, nga 15% në vetëm 5%.

Kryeministri Rama vizitoi një prej sipërmarrësve që përfiton nga kjo ulje e konsiderueshme e taksës. Ai u shpreh i kënaqur dhe tha se kjo lehtësi do t’i shërbejë për të zgjeruar aktivitetin dhe për të rritur fitimin e kompanisë në të ardhmen.

Në këtë vizitë merrte pjesë edhe ministri i Financave dhe Ekonomisë, Arben Ahmetaj, i cili shpjegoi se nga paketa e re përfitojnë një kategori e madhe sipërmarrësish, por edhe mijëra qytetarë, të cilëve nga 1 janari iu ulet tatimi mbi të ardhurat personale.

“Më 1 janar ka filluar një paketë shumë e rëndësishme uljeje taksash, që fillon nga biznesi i vogël me xhiro nën 14 milionë lekë, për të cilin taksa zbritet në 1/3-n. Kemi vazhduar me agrobiznesin, me të gjithë biznesin bujqësor, me qytetarët, klasën e mesme, me uljen e tatimit mbi të ardhurat personale. Mbështetja për bujqësinë vazhdon me zerimin e TVSH-së për inputet bujqësore dhe me normë të reduktuar për një sërë aktivitetesh të TVSH-së. Ky është viti me rritjen më të madhe ekonomike për Shqipërinë”, u shpreh Ahmetaj.

Sipas tij, sot janë 91% e sipërmarrjeve shqiptare që paguajnë 0 ose 5% tatimfitimi, si dhe 98% e të punësuarve që paguajnë 5.5% taksë pune.

Kryeministri Rama deklaroi veç të tjerash se, kjo lehtësi fiskale për biznesin do të përkthehet në më shumë vende të reja pune, si dhe në rritjen e pagave të të punësuarve në sektorin privat.

“Në fakt, kjo është zona më delikate e punësimit. Të gjithë bizneset, nga 8 milion në 14 milion xhiro vjetore, që, deri dje e kishin 15% taksën e fitimit, e kanë 3-fish më të ulët nga sot, por kanë kapacitete punësimi dhe vetëpunësimi shumë të mëdha. Ajo që është më e rëndësishmja, në këndvështrimin tonë, është që, duke ju lehtësuar 3-fish, ju japim mundësi, e para, që të zhvilloheni me investime të reja dhe besoj, menjëherë, ju do mendoni për një investim të ri për tu zgjeruar, për tu konsoliduar dhe e dyta, për të rritur punësimin dhe për të rritur pagat”, deklaroi kryeministri Rama.

Ai shtoi nga ana tjetër se është e nevojshme të ulet numri i atyre që shkojnë në universitet dhe të rritet numri i atyre që shkojnë në arsim profesional dhe në kolegje profesionale dyvjeçare, që të bëhen specialistë, në mënyrë që të mos paguhen të huajt për një punë profesionale.