Ushtria e Koresë së Jugut alarmon: Koreja e Veriut lëshoi një predhë të paidentifikuar drejt detit të Japonisë

Koreja e Veriut lëshoi të enjten një predhë të paidentifikuar drejt detit, në lindje të Gadishullit Korean, njoftoi ushtria e Koresë së Jugut.

Qeveria e Japonisë bëri të ditur se Pheniani lëshoi një objekt që mund të ketë qenë një raketë balistike.

Ky lëshim i ri pason një sërë testesh që Koreja e Veriut ka kryer gjatë këtij viti, përfshirë raketa balistike me rreze të shkurtër veprimi, raketa artilerie dhe sisteme të tjera taktike të armatimit, me synimin për të forcuar kapacitetet ushtarake të vendit të izoluar.

Testi më i fundit i konfirmuar i sistemeve të armatimit u zhvillua në fund të qershorit dhe përfshinte një lëshues të shumëfishtë raketash 240 milimetra të modernizuar, raketa balistike taktike dhe një obus vetëlëvizës 155 milimetra, sipas agjencisë shtetërore të lajmeve KCNA.